إحنا مين ؟

إحنا مين ده سؤال لكل السامعين
إحنا التاريخ جوا كتاب كل السنين
ولا إحنا شجرة فـ أرض غيرنا مزروعين
ولا إحنا نسمة فـ صدر يائس مزنوئين

ألقى الإجابة فـ قلب كل الحزنانين
يرجع سؤالي لكل غالي بإحنا مين

إحنا الفراعنة و أتصرعنا من كلاب
ولا إحنا طيف بيعدي هوجة من الضباب
ولا إحنا ظل بيستحي فـ النور يبان
نتخبى جوه سحابة سودة عالحيطان
إحنا الغلابة فقلب غابة معششين

و ألقى الإجابة فـ قلب كل الحزنانين
يرجع سؤالي لكل غالي بإحنا مين

إحنا أبتدينا و أنتهينا من زمان
ولا إحنا لسه جوه مكنون الكيان
ولا إحنا عالم و أتنسينا فـ الحارات
و العاقل اللي يفك سجنه للحيات
إحنا تراب الأرض ليها مسلّمين

و ألقى الإجابة فـ قلب كل الحزنانين
يرجع سؤالي لكل غالي بإحنا مين

إحنا جنود الحق عـلى الأرض السلام
ولا إحنا ناس عايشة بتتحدى الكلام
ولا إحنا آهه بتملى صوت الكون سكون
و الشكوى باينة فـ دمع نازل م العيون
إحنا الطاحونة فـ وسط ساقية ملفلفين

و ألقى الإجابة فـ قلب كل الحزنانين
يرجع سؤالي لكل غالي بإحنا مين

فن السياسة

قالوا سياسة دى فن الممكن قلت أنا عندى لمصر سؤال
هل مالممكن إن الممكن يبقى بأيدنا و حاله مُحال؟؟

أيه اللى ناقصنا عشان نتحرر
أيه اللى يفيدنا مدام بنقصر
أيه اللى يخلى الناس دى تفكر
تحكى و تسمع ميت موال؟

قالوا سياسة دى فن الممكن قلت أنا عندى لمصر سؤال

أرض و خيرها فى ضيها سارِح
ناس و مهياش لأيا مطارِح
سُلطة فى شر عملها جوارِح
كلّه كلام و مفيش أفعال؟

قالوا سياسة دى فن الممكن قلت أنا عندى لمصر سؤال

ليلة و ليلة و صبح مفيش
أمتى يجينا الحق نعيش
بنا و زارِع مُش دراويش
ندعى فى بالنا يدوم الحال؟

قالوا سياسة دى فن الممكن قلت أنا عندى لمصر سؤال
هل مالممكن إن الممكن يبقى بأيدنا و حاله مُحال؟؟

أصطباحة

نزلت في الصباح الباكر من منزلي لأبدأ يوم جديد من ايام حياتي، كُنت قد استيقظت قبل ساعة (فأخذت فطاري و كباية الشاي) و قرات الجريدة المملة المليئة بحروف و نقاط كثيرة! و ها أنا ذا أتوجه الى سيارتي، أروح فين؟؟؟ أه الشغل!

المهم،(ماشي في أمانة الله)، مبطئاً في سيري لاُني لست متأخراً. أنظر الى الناس في كل الاتجاهات فلا أرى في الوجوه ثبات، ارى الحزن متشقق على وجوه العواجيز وأرى الحزن في خبايا بطون الأ مهات، أرى الحزن في تراتيل المحبة و حبة حبة علشان خاطر الكلام صعب على اللسان.

المهم، بسمع إيه؟ دي الاف أم* شكلها " فكهاني وبحب الفاكهه و بموت فى الموز و المنجه، العنب العنب العنب". لم اتردد لحظة واحدة في أن أدير المؤشر.

المهم، أغلقت الراديو و بدأت أنظر الى الناس من جديد.. مفيش جديد! بدأت أسرح في خيالي، في الوضع الحالي الذي نعيشه و نستنشقه ونحلم به كل يوم. هل من أمل؟ هل من واقع منشود نشدو له؟ هل تتغير عقول الناس؟ هل تتغير الضمائر في نفوس المتسلطين؟ هل يُمحى الجهل من أدمغة المتعفنين فى عقول خربانين؟ قول يا رب، قول أمين!

و الغريبة أن الطريق زحمة!!، (ما غريب إلا الشيطان) ..أه صحيح ده النهاردة عيد، عيد تحرير سينا و أختناق المدينة و أهو كل يوم مولد، وكل سنة وإنتوا طيبين! و هي الناس بقت مستعجلة على الفاضي ولا الواحد هو اللي ما بقاش راضي؟ الغريبة إن كل واحد بيطلّع خلقه في التاني، و أناني، مع ان مصلحته في محبة التاني!

هي التوعية، مفيش غير التوعية. وعلى رأي الشيخ إمام: " خلاص خلاص مافيش خلاص، يا تجهزوا جيش الخلاص يا تقولوا على العالم خلاص"**. و أنا مُش عايز أقول خلاص. وعلى رأي عمر دياب***: " ملهاش حلّ تاني، يانعيش الحياه أنا و انتي يا وقفت في مكاني!" يا عم أسكت بقى، أهى وقفت. لأ و إيه؟ واقفين. الغِل بنار جوه كل واحد، تحرق فيه وتحرق في اللي حواليه ويطلّعوا دخان و نموت مخنوقين وأحنا عايشين.


* FM 100,6 قناة أغانى تجمع بين الفن الهابط و النص نص و الجميل أحياناً، أزواق بقى!
** جيفارا مات لأحمد فؤاد نجم
*** أسف

أنا....

أنا الفقير، أنا الأسير، أنا المستنير
أنا الشريف، أنا العفيف، أنا الضمير
أنا الخير، الحب و القلب الكبير
أنا السجين للصبر و مخاوي المصير

البسمة صافية و السعادة بحور سحاب
و الشمس دافية و ضحكتي تملى السراب
و الهمة شافية للجروح و الأغتراب
جوه بلاد جدي اللي سأياني العذاب

أنا الأمل لبلادي فـ كتاب الآمال
أنا اللي طاير شادي لبهاء الجمال
أنا اللي عايش جوه مليون أحتمال
للكل حقه فـ إنه يتحدى المحال

أنا الشيوع بين البشر بالأنتصار
أنا اللي داء الظلم و أستحمل و ثار
أنا اللي خايف عالعدالة لكل جار
من جنب بيتي لحد أخر العمار